Алматының тау бөктерінде барлығы 51 моренді көл бар, оның алтауы – ең серпінді. Бұл Кіші Алматы өзені бассейніндегі №6 көл; Үлкен Алматы бассейніндегі № 10, 13-бис көлдері және Ақсай өзені бассйніндегі № 8, 9, 10 көлдері.

Қазіргі уақытта Алматы қаласындағы сел қаупі тұрақты және ерекше бақылауда. Көлдердің көп бөлігі 65-70% - ға толады - су деңгейі қауіпсіз белгілерде.

Қазіргі кезде тауларда ауа температурасы 5-6°С құрайды. Шілдеде биік таулы аймақтағы орташа айлық температура 7-15°с шегінде ауытқиды. «Қазгидромет» РМК ұзақ мерзімді болжамы бойынша жазғы кезеңде тауларда ауа температурасының жоғарылауы күтіледі, кейде нормадан жоғары (22°С дейін). Сел шығарындыларының алдын алу үшін биыл моренді көлдердің суы ағызылады. Алматының жергілікті бюджет резервінен осы мақсаттарға 36,3 млн теңге бөлінді. Бұл қаражатқа су ағызу арналарын тазарту және тереңдету үшін өнімділігі жоғары сорғылар, сифон құбырлары, дәнекерлеу аппараттары және басқа да жабдықтар сатып алынады.

Алматы әкімі Ерболат Досаев тау өзендеріндегі гидрометеорологиялық, көшкін, су тасқыны, сел жағдайына тұрақты бақылау жүргізуді және күшейтуді тапсырды.

«Қазселденқорғау» ММ мамандары 10 тұрақты және 3 маусымдық постарда бақылау жүргізеді. 20 маусымнан кейін қалған 10 маусымдық постта бақылау басталады.

Ақпарат көзі: Алматы қаласы әкімдігінің баспасөз қызметі